یونس خان به د افغان ملي ټیم د بیټنګ روزونکی شي
تاند- د افغانستان د کرکټ بورډ مسوولان وايي، د پاکستان د کرکټ مشهور پښتون لوبغاړی یونس خان به د افغانستان د کرکټ ملي ټیم د بیټنګ روزونکی شي.
د افغانستان د کرکټ بورډ ريیس عاطف مشعل یوې پاکستانۍ ورځپاڼې (ډان) ته ویلي، د پاکستان پخوانی بټسمن یونس خان به ویسټ انډیز ته د افغانستان د ملي لوبډلې په سفر کې له افغان ټیم سره ملګری وي.
ده ویلي چې یونس خان موافقه کړې چې د روانې میاشتې په پای کې له تقاعد کېدو وروسته د افغانستان د ټیم د بیټنګ روزونکی شي.
تر دې وړاندې کبیر خان، انضمام الحق او راشد لطیف د افغانستان د ټیم د روزونکو په توګه کار کړی دی.
یونس خان په تېر اپریل کې په ټیسټ لوبو کې ۱۰ زره منډې بشپړ کړې چې یو لوی ریکارډ دی.
