محمد نبي د غوره باولینګ جایزه وګټله
تاند- د افغانستان د کرکټ تکړه لوبغاړی محمد نبي نن /دوشنبه/ د هند د غوره لیګ په سیالیو کې د ښه ځلېدو په خاطر پام ځان ته واړاوه.
د حیدراباد سن رایزرس، چې محمد نبي او راشد ارمان پکې لوبېږي، له مومبي انډینز سره مخامخ شو.
محمد نبي په نننۍ مسابقه کې د خپلې لوبډلې لپاره نه یوازې د سیال ټیم لومړنی لوبغاړی وسوځاوه بلکې په څلورو اوورونو کې یې یوازې ۱۳ منډې ورکړې چې په دې سیالي کې د یوه باولر له لوري تر ټولو لږې منډې وې.
محمد نبي د ښه باولینګ په خاطر جایزه هم ترلاسه کړه.
دا د هند په غوره لیګ کې د محمد نبي دوهمه لوبه وه. ده په تېره مسابقه کې هم یو لوبغاړی سوځولی و.
تمه کېږي چې محمد نبي ته به، د ده دې لوبې ته په کتو، په نورو سیالیو کې هم د لوبېدو چانس ورکړل شي.
راشد خان هم په دې مسابقه کې له محمدي وروسته د سن رایزرس لپاره تر ټولو اقتصادي لوبغاړی و.
راشد ارمان په ۴ اورونو کې د یوه لوبغاړي د سوځولو ترڅنګ ۲۲ منډې ورکړې.
سن رایزرس لوبډلې دا مسابقه د مومبي له انډینز څخه په ۷ ویکټونو او ۱۰ توپونو وګټله.
