د برازیل د چاپکوییس د فوټبال لوبغاړي د هوايي پېښې ښکار شول
تاند- په جنوبي امریکا کې یوه الوتکه، چې د برازیل د یوه فوټبال کلب لوبغاړي هم پکې سپارل ول، په کولمبیا کې ولوېده.
دا الوتکه له بولوویا څخه کولمبیا ته روانه وه چې مډلین ښار ته نژدې ولوېده.
په الوتکه کې د برازیل د چاپکوییس فوټبال کلب لوبغاړي هم سپاره ول.
چاپکوییس د برازیل په غوره لیګ یا لومړی درجه لوبډلو کې شمار دی.
ټاکل شوې وه چې دا برازیلي لوبډله د جنوبي امریکا د فوټبال لیګ د سیالیو په دوام کې له اتلتیکو نشنل ټیم سره په مډلین ښار کې مسابقه وکړي.
د جنوبي امریکا د فوټبال کنفدرېشن تر بلې خبرتیا پوري ټولې مسابقې ځنډولي دي.
راپورونه وايي چې په دغه الوتکه کې ۹ تنه عمله او ۷۲ نوره سپرلي مړه شوې ده.
پولیس وايي چې په دې پېښه کې ۵ تنه ژوندي پاتې شوي دي.
د الوتکې د غورځېدو علت د هغې په برېښنايی سیستم کې تخنیکی ستونزه بلل شوې ده.
