جرمني، کرویشیا او تورکیه د اروپايي جام د ۳ شنبې د ورځې ګټونکي

تاند- د اروپايي جام د سیالیو په دوام کې د سې شنبې په ورځ /جون ۲۱/ د جرمني، تورکیې /ترکیې/ او کرویشیا ټیمونه بریالي شول.

جرمني شمالي ایرلنډ ته یو پر صفر ماتې ورکړه. لوبه تقریباً په سلو کې ۷۹ د جرمني لوبغاړو په کنټرول کې وه او که یې تېروتنې نه وای کړي او تر یوه حده طالع د شمالي ایرلنډ په ګټه نه وای ممکن جرمنیانو ایرلنډیانو ته ۵ ګولونه ورکړي وای.

د شمالي آیرلنډ لوبغاړو د لوبې د ګټلو لپاره نه بلکې د لږ ګولونو د خوړولو لپاره تر پایه مقاومت وکړ او جرمنیان یې پرې نښودل چې تر یوه زیات ګولونه ووهي.

دوې نورې مسابقې، چې هممهاله وشوې، د تورکیې او چک جمهوریت او همداراز د هسپانیا او کرویشیا ترمنځ وې.

د هسپانیا غښتلي ټیم، سره له دې چې تر کرویشیا زیات پر لوبه کنټرول درلود دوه پر یو لوبه وبایلله.

او چک جمهوریت هم د ټولو د توقع خلاف دوه ګولونه وخوړل. چکي لوبغاړو د تورکیې د دوو ګولونو په وړاندې هیڅ ګول ونه کړای شو.

اوس په (A) ګورپ کې فرانسه، په (B) ګروپ کې ویلز، او په (C) ګروپ کې جرمني لومړی مقامونه لري.