د فامېلۍ سوپر لیګ: شېرکړ بازانو پایلوبې ته لاره وکړه| حضرت عثمان نوري

د ننګرهار د غني خېلو ولسوالۍ اړوند د ګلاهي قریې په فامیلۍ کرکټ لوبغالي کې د [فامیلۍ سوپر لیګ] تر نامه لاندې د کرکټ لوبلړ پېل شوی دی. ددې لوبلړ په جریان کې نن چهارشنبه چې د سلواغلې له درویشتمې نېټې سره برابره وه. د شېرګړ بازانو او نواقېلو لوبډلو ترمنځ د نیمه پایلوبې سیالي ترسره شوه.

ټاس نواقېلو لوبډلې وګاټه او لومړی توپوهنه یې غوره کړه او په ټاکل شوو ۱۰ اورونو کې تر ډېره بریده ښې منډې وکړې او سیالې لوبډلې ته یې د ۷۴ منډو هدف وټاکه.

په ځوابي توپوهنه کې د شېرګړ بازانو لوبډلې وتوانېده چې هدف ترلاسه کړي. دې لوبډلې ته عبدالله درې اورونه ترسره کړل، ۱۵ منډې یې ورکړې او د سیالې لوبډلې ۴ پياوړي لوبغاړي یې وسوځول.

د نواقېلو لوبډلې لپاره بیا صفي الله د پام وړ توپ اچونه نندارې ته وړاندې کړه، نوموړي په ۳ اوورونو کې ۲۱ منډې ورکړې او ۵ ویکټې یې واخیستې.

ددې سیالۍ په ګټلو سره شېرګړ بازانو لوبډلې پایلوبې ته لاره ومونده.

سبا پنج شنبه/د سلواغې څلور ویشتمه/ ددې سیالېو په لړ کې د فامېلۍ سوپر سټار لوبډله د پله سر سټار لوبډلې خلاف په سیمي فاینل کې لوبیږي.

یاده دې وي چې دا لوبلړ د ځوانانو د یووالي په موخه پر لاره اچول شوی دی.