بي پي ایل: نن جمعه ماښام راج شاهي رایلز له کولنا ټایګرز سره پایلوبه کوي
د بنګله دېش سوداګریز کرکټ لیګ دویمه کوالیفای لوبه کې راج شاهي رایلز کرکټ لوبډلې، چټوګرام چلېنجرز کرکټ لوبډلې ته په ماتې ورکولو سره پایلوبې ته لاره موندلې وه. د بنګله دېش سوداګریزې کرکټ لوبې چې د ډېسمبر په ۷ مه نېټه د ۷ لوبډلو په ګډون پیل شوې وې، د چهارشنبې په ماښام یې مهمه لوبه ترسره شوه.
دا لوبه چې پایلوبې ته د تګ په خاطر وشوه، پکې راج شاهي رایلز کرکټ لوبډلې، چټوګرام چلېنجرز کرکټ لوبډلې ته په دوه وېکټو ماته ورکړه او پایلوبې ته ولاړه. د چټوګرام چلېنجرز کرکټ لوبډلې لپاره کرېس ګېل په ۲۴ توپونو ۶۰ منډې وکړې او هدف یې تر ۱۶۵ منډو ورساوه.
راج شاهي کرکټ لوبډلې هدف په شلم اوور کې د ۸ لوبغاړو په سوځېدو سره د انډري رسل د ۵۴ ناسوځېدلو منډو په مرسته پوره کړ او چټوګرام چلېنجرز کرکټ لوبډلې ته یې په ۲ وېکټو ماته ورکړه.
په نیمه پایلوبه کې د لوبې غوره لوبغاړی انډري رسل وپېژندل شو؛ هغه په ۲۲ توپونو د ۷ شپږیزو او دوه څلوریزو په مرسته ۵۴ ناسوځېدلې منډې وکړې.
نن به ددې سوداګریز لیګ پایلوبه ترسره کیږي. پایلوبه نن د جمعې په ماښام د جنوري په ۱۷ مه نېټه راج شاهي رایلز کرکټ لوبډله له کولنا ټایګرز کرکټ لوبډلې سره پایلوبه کوي. دا چې کومه لوبډله دا پایلوبه ګټي، وخت به یې ثابته کړي.
