بنګله دېش هم د نړیوال ۲۰ اوریز جام په ۱۰ غوره لوبډلو کې شامل شو
تاند- په هند کې د کرکټ د ۲۰ اووریز نړیوال جام سیالیو په دوام کې بنګله دېش نن /یکشنبه/ عمان ته په ۵۴ منډو ماتې ورکړه او د نړیوال جام بل پړاو ته یې لاره وموندله.
بنګله دېش، چې په اې ګروپ کې و، د افغانستان په شان، چې په بي ګروپ کې و، د نړیوال شل اوریز جام لسو غوره لوبډلو ته غوره شو.
بنګله دېش له پاکستان، هند، استرالیا او نیوزیلنډ سره په یوه ګروپ کې شامل شو.
د بنګله دېش او عمان مسابقه د پر له پسې باران له کبله ۱۲ اوورونو ته رالنډه شوه. بنګله دېش په ۱۲ اوورونو کې ۱۲۰ منډې هدف وټاکه، خو د عمان لوبغاړو په ۱۲ اوورونو کې د ۹ لوبغاړو د سوځېدو په بدل کې ۶۵ منډې جوړې کړای شوې.
د لوبې پچه عمان ګټلې وه خو غوره یې بللې وه چې لومړی بیټنګ بنګله دېش وکړي.
د بنګله دېش لپاره تر ټولو ښه لوبه تمیم اقبال وکړه. ده ۶۳ منډې وکړې.
