لیکوال: ولادېمیر سوتییف
ژباړونکی: ګل جان صابر
یوه ورځ ستن، پنسل، قلم او پنډوس(توپ) په دې خبرې سره کولې چې کوم یو تر ټولو غوره(ښه) دی.
ستن وویل:
– زه تر ټولو غوره یم! تاسو وګوری چې زه څومره تېره یم…
پنسل وویل:
– نه، زه تر ټولو غوره یم! زه د لرګي څخه جوړ یم او په طلایي رنګ را باندې ليکل شوي دي: «مخکښ».
قلم چیغه وکړه:
– زه ډېر غوره یم! زه د ښکلي پلاستیک څخه جوړ شوی یم او نوک مې د سپینو زرو په څېر ځلېږي.
پنډوس هېڅ و نه ویل خو ټول پوهېدل چې هغه هم ځان تر ټولو غوره بولي.
هغوی ډېر وخت خبرې وکړې، شور ماشور یې وکړ خو بیا یې هم پرېکړه ونشوه کړی چې د دوی کوم یو تر ټولو غوره دی.
ناڅاپه هنرمن لاسونه راغلل او ویې ویل:
– سلام زما ګرانې ستنې! هنرمن لاسونو ستن را واخیستله، د هغې په سپم کې یې روښانه سپڼسی و پییود او د رخت په یوه ټوټه یې ښکلی چرګوړی ګلدوزي کړ.
ستنې په ویاړ سره وویل:
– و مو لیدل چې زه څومره هنرمنه یم! ما خو تاسو ته وویل!..
پنسل، قلم او پنډوس پیکه شول- ؛نډل شوی چرګوړی رښتیا هم ډېر ښکلی و.
هنرمنو لاسونو وویل:
– سلام زما ګرانه پنسله!
هنرمنو لاسونو پنسل او یوه پاڼه کاغذ را واخیستل او په بیړه- بیړه یې یو ښکلی رسم و ایست.
پنسل په ویاړ سره وویل:
– وګورئ، وګورئ، زه څومره ښه یم! څوک ویلی شي چې زه انځورګر نه یم!
قلم او توپ له ډېرې کینې هېڅ ونشوه ویلی یوازې ستنې په کبرجن ډول خپل تار وښوراوه او وپسېده:
– انځورګري ته خوشاله دی! ګنډل تر انځورګري سخت دي…
هنرمنو لاسونو قلم را واخیست، د هغه نوک یې په رنګ کې غوټه کړ او ښکلي ټکې یې ولیکل. قلم خوشاله شو:
– ښکاره خبره ده چې زه تر ټولو غوره یم! بېله ما څوک کولی شي چې داسې ښکلي لیکل وکړي.
په دې وخت کې ټولو ومنله چې قلم ښه لیکنه وکړه او دا لیکنه له چرګوړي او رسم څخه کمه نه ده. یوازې پنډوس خواشینی شو، اسوېلی یې وکړ او هېڅ یې و نه ویل خو ټول پوه شول چې هغه وروسته له دي ځان تر ټولو ښه نه ګڼي.
د ټولو په هغه زړه وسوځېد.
هنرمنو لاسونو پنډوس را واخیست او له هغه سره انګړ ته ووتل، پنډوس لوړ او لوړ ټوپونه وهل. پنډوس په خوښی چیغې وهلې:
– وګوری چې زه څه کولی شم! وګورئ چې زه څرنګه ټوپونه وهم! وګورئ! وګورئ!
مور راغله.
د هغې ګنډل شوی چرګوړی او انځور خوښ شول، لیکل شوي څه یې ولوستل او له کړکۍ یې د باندې وکتل، هلته هنرمنو لاسونو له پنډوس سره لوبې کولې. مور موسکی شوه او ویې ویل:
– زما ګرانې لورې، هنرمن لاسونه لرې.
