تاند (جمعه، د زمري/ اسد ۸ مه) د کابل د معلوماتي ټکنالوژۍ او مخابراتو لومړی پنځه ورځنی نندارتون د شاوخوا ۳۰ قراردادونو او تفاهملیکونو په لاسلیک، چې ټول ارزښت یې ۱۰ میلیونه ډالره و، پای ته ورسېد. د نندارتون د پای په مراسمو کې چارواکو د مصنوعي ځیرکتیا (AI)، ډیجیټلي حکومتولۍ او نوې ټکنالوژۍ د کارونې په اړه خبرې وکړې.
دا نندارتون د مخابراتو او معلوماتي ټکنالوژۍ وزارت په نوښت د افغانستان د نړیوالو نندارتونونو په مرکز کې جوړ شوی و.
د وزارت د چارواکو په وینا، په نندارتون کې شاوخوا ۲۰۰ کورنیو او بهرنیو شرکتونو ګډون کړی و او کابو ۱۵۰ زره کسان یې نندارې ته ورغلل.
د مراسمو په څنډه کې د مخابراتو وزارت د «راکړو ورکړو د لارښود آنلاین سیستم» هم پرانیست.
د طالبانو د حکومت مرستیال ویاند حمدالله فطرت د پای په مراسمو کې وویل، د مصنوعي ځیرکتیا کارول، د ډیجیټلي حکومتولۍ پراختیا، د مخابراتي خدمتونو ښه کول او د معلوماتو امنیت د دولتي ادارو چارې اغېزمنولی شي.
هغه زیاته کړه، افغانستان باید «د اسلامي او ملي ارزښتونو په چوکاټ کې» له نوې ټکنالوژۍ څخه د شفافیت د زیاتوالي او د خدماتو د ښه والي لپاره ګټه واخلي.
د افغانستان د سوداګرۍ او پانګونې خونې مرستیال مجیبالرحمن شیرزاد وویل، په هېواد کې سوداګري او پانګونه لا هم په دودیز ډول پر مخ وړل کېږي او د سیمې او نړۍ په بازارونو کې د سیالۍ لپاره د نوې ټکنالوژۍ کارول اړین دي.
د طالبانو د عدلیې وزارت مسلکي مرستیال عبدالحکیم حیدر وویل، د ټکنالوژۍ پراختیا باید د اسلامي احکامو او ارزښتونو سره برابره وي.
هغه وویل: «که د شرعي اخلاقو پر وړاندې لوېدیځ اخلاق ځای ونیسي، موږ یې نه منو.»
د مخابراتو وزارت مالي او اداري مرستیال حافظ محمدامین جان عمري وویل، دغه وزارت به د پانګونې د جلب او د ټکنالوژۍ د ودې لپاره ورته نور نندارتونونه هم جوړ کړي.
دا نندارتون ۵ ورځې د لیدونکو پر مخ پرانیستی و.
په جمهوریت کی یوځلموټی له ډیر وخت وروسته له اروپا راستون شوی وو یو مشر ورته په ټوکه وویل چی هلکه د خنزیر غوښه خوبه دی نه دوی خوړلی ځلمی په خندا شو ویی ویل غوښه ډیره قیمت وی مونږ به یواځی شوروا خوړله د عدلیی وزارت مسلکی معین صاحب هم هغه شان خبره کړی ده غوښه ی نه خوری خو شوروا یی خیر دی