تاند (سې شنبه، د چنګاښ/ سرطان ۳۰ مه) د کانونو او پټرولیم وزارت وايي، چې په تېر یوه کال کې یې له کورنیو شرکتونو سره د شاوخوا ۱۰ میلیارد افغانیو په ارزښت د کانونو د استخراج ۱۰۹ قراردادونه لاسلیک کړي دي.
دغه وزارت په خپل تازه راپور کې، چې پرون یې خپور کړ، ویلي چې د افغانستان د کانونو په سکټور کې د کورنیو شرکتونو او د سیمې د هېوادونو د پانګهوالو لېوالتیا زیاته شوې ده.
افغانستان د مسو، وسپنې، سرو زرو، لیتیم، کرومایټ، ډبرو سکرو او ګڼو نورو معدني موادو پراخې زېرمې لري، او طالبان دا زیرمې د هېواد د اقتصادي ودې له مهمو بنسټونو څخه ګڼي. د کانونو وزارت د کانونو پراختیا د کورنیو عوایدو د زیاتوالي او د افغانستان د اقتصاد د پیاوړتیا یوه مهمه لار بولي. طالبان وایي، د کانونو پراختیا به د حکومت عواید لوړ کړي، کاري فرصتونه به رامنځته کړي او د افغانستان اقتصادي اتکا به راکمه کړي.
وروسته له هغې چې طالبان بیا واک ته ورسېدل او بهرنۍ مرستې کمې شوې، په دې برخه کې یې هڅې زیاتې کړي چې د ګمرکونو، مالیاتو او طبیعي سرچینو له لارې کورني عواید زیات کړي.