تاند ( سه شنبه د لیندۍ ـ قوس ۴مه) تېره شپه د خوست ولایت پر ګربز ولسوالۍ د پاکستان هوايي بریدونو له امله د یوې کورنۍ ۱۰ غړي وژل شوي دي.
د طالبانو ویاند، ذبیح الله مجاهد ویلي، چې په دې برید کې د یوې ښځې په ګډون ۵ هلکان او ۴ نجونې وژل شوې دي.
له دې سره سره پر پکتیکا او کونړ ولایتونو هم د پاکستان د هوايي بریدونو پخلی شوی دی.
په دغو بریدونو کې مجاهد یوازې د ۴ ملکي وګړو د ټپي کېدو خبره کړې ده.
دا بریدونه داسې مهال شوي، چې د طالبانو او پاکستان ترمنځ له تېرو څو اوونیو راهیسې اوربند روان دی، خو په همدې بریدونو سره مات شوی دی.
طالبانو تر اوسه د پاکستان د هوايي یرغل د ځواب په اړه غبرګون نه دی ښودلای.