تاند『یکشنبه د چنګاښ ـ سرطان ۲۹مه』سبا د هېواد په ولایتونو کې د پولیو واکسین کمپاین پیلېږي.
له پولیو څخه د پاک افغانستان ادارې ويلي، چې دغه کمپاین به سبا د دوشنبې په ورځ پیل شي.
د سرچینې په وینا د پولیو ضد واکسین پېلېدونکي دې پړاو کې به له ۵ کلونو کم عمره زرګونه ماشومانو ته واکسین ورکړل شي.
دا کمپاین داسې مهال پیلېږی چې له پاکستانه د افغان کډوالو د اېستل کېدو لړۍ هم چټکه شوې او د ګوزڼ د لا پراخېدو وېره شته.
د پولیو بېړني مرکز په وار-وار له پاکستان نه ستنېدونکو افغانانو غوښتي چې د ډیورنډ کرښې په اوږدو کې خپلو ماشومانو ته د ګوزڼ ضد څاڅکي تطبیق کړي.
په ورته مهال د طالبانو د عامي روغتیا وزارت مسؤلانو هم د دې ملي کمپاین د پیل پخلی کړی دی.
د دغه وزارت ویاند ډاکټر شرافت زمان امرخېل رسنیو ته ویلي چې، د دغه څلور ورځني کمپاین پر مهال به په ۱۹ ولایتونو کې ۷،۳ میلیونه تر پنځو کلونو کم عمره کوچنیانو ته د پولیو ضد دوه څاڅکي واکسین تطبیق شي.
امرخېل زیاته کړې چې دغه کمپاین به په مرکزي، سوېل، ختیځ، لوېدیځ او شمال ختیځ زونونو کې د نړیوالو بنسټونو په مالي ملاتړ تطبیق شي.
دا کمپاین داسې مهال پیلېږي چې د روان ۲۰۲۵ زېږدیز کال له پیل راهیسې د ټول هیواد په کچه په بادغیس ولایت کې د پولیو ناروغۍ یوه مثبته پېښه ثبت شوې ده.