تاند『چهارشنبه د چنګاښ ـ سرطان ۱۱مه』د طالبانو د کورنیو چارو وزارت ویاند په یوه خبرپاڼه کې ویلي، چې په قطر کې د نشهيي توکو پر وړاندې د مبارزې دوه ورځنۍ غونډه پای ته ورسېده.
په خبرپاڼه کې د یاد وزارت ویاند عبدالمتین قانع زیاتوي، چې دغه غونډه د یوناما په مشرۍ او د قطر په کوربتوب جوړه شوې وه.
نوموړي زیاته کړې وه چې په دې غونډه کې د نړۍ د ۲۹ هېوادونو استازو ګډون کړی وو.
په دې غونډه کې د طالبانو د حکومت د کورنیو چارو وزارت له نشهيي توکو سره د مبارزې معینیت استازو هم ګډون کړی و.
د خبرپاڼې په حواله په دغې غونډه کې، له نشهيي توکو سره پر ګډې مبارزې، د بديل معيشت رامنځته کولو او د روږدو د ساتنې او درملنې په برخو کې مهم بحثونه وشول.
خبرپانه د قانع له قوله وايي چې د دغې غونډې په پای کې، د هېوادونو له لوري له نشهيي توکو سره د مبارزې په برخه کې له افغانستان سره د همکارۍ او مرستو ژمنې وشوې.