تاند (شنبه، د وري/ حمل ۹ مه) د مهاجرت نړیوال سازمان (IOM) راپور ورکړی چې د مارچ په درېیمه اوونۍ کې ۷۳,۳۶۴ افغانان خپل هېواد ته راستانه شوي، په داسې حال کې چې ۳۶,۱۶۶ نور له هېواده وتلي دي.
آی او ایم ویلي، د دې زیاتوالي اصلي لامل له ګاونډیو هېوادونو، پاکستان او ایران څخه د افغانانو د خپلې خوښي بېرته ستنېدا ده.
د آی او ایم د راپور له مخې، د تېرو اوونیو پرتله، د مارچ په درېیمه اوونۍ کې د بېرته راتګ بهیر ۲ سلنه زیات شوی، خو د وتلو شمېر ۱۳ سلنه کم شوی دی.
د تورخم لار، چې د فبرورۍ په ۲۱مه تړل شوې وه، د مارچ په ۲۲مه بیا پرانیستل شوه.
بلخوا، د پاکستان حکومت ټولو “غیر قانوني بهرنیانو” او د افغان تابعیت کارت (ACC) لرونکو ته امر کړی چې د مارچ تر ۳۱مې له هېواده ووځي، که نه، د اپرېل له لومړۍ نېټې څخه به له هېواده وایستل شي.
د سلو ټولنو او فعالانو غوښتنه
د نړیوالو ستراتیژیکو دعوو شورا په مشرۍ د بشري حقونو تر سلو ډېرو ټولنو او فعالانو په یوه پرانیستي لیک کې، له پاکستان څخه غوښتي چې د افغان کډوالو د ایستلو لپاره د مارچ د یودېرشمې ضربالاجل لغوه کړي، ځکه چې دوی به افغانستان ته د بېرته استول کېدو په صورت کې له جدي ګواښونو سره مخامخ شي.
پاکستان، افغان کډوالو ته ویلي چې یا تر ټاکلې نېټې د دغه هیواد له خاورې ووځي او یا به په زوره وایستل شی.
په داسي حال کې چې د پاکستان ضربالاجل ته یوازې دوې ورځې پاتې دي، دغه ائتلاف د پاکستان له صدراعظم شهباز شریف څخه غوښتي چې خپله پرېکړه بېرته واخلي او ډاډ ورکړي چې عملي به نه شي.
په دې لیک کې، چې پرون (جمعه) د پاکستان صدراعظم شهباز شریف او لوی څارنوال منصور عثمان اعوان ته استول شوی، راغلي چې دوی د افغان کډوالو نیونې، په زوره له پاکستان څخه ایستنه او پراخې بشري سرغړونې غندي.
دا ائتلاف ټینګار کوي چې د افغان کډوالو د حقونو او خوندیتوب لپاره سمدستي اقدامات اړین دي.
په ګډ لیک کې راغلي چې یاد ضربالاجل د پاکستان له قانوني ژمنو سره په ټکر کې دی، ځکه چې کډوال مجبوروي چې بېرته هغه هېواد ته لاړ شي، چې دوی له جدي امنیتي ګواښونو او د ازادۍ له محدودېدو سره مخامخ کېږي.
په راولپنډۍ کې تر ۹۰۰ ډېر افغان کډوال نیول شوي
په همدې حال کې د پاکستان امنیتي ځواکونو افغان کډوالو ته د ټاکلي ضرب الاجل په درشل کې په راولپینډۍ کې لږ تر لږه ۹۲۳ افغان اتباع نیولي دي.
د راپور له مخې، د دغو کسانو له منځه ۲۱۳ تنه افغانستان ته استول شوي دي.
پاتې کسان د ښار په لمنه کې، د ګلړه موړ سیمې ته نژدې، د کډوالو په یو موقت مرکز کې ساتل کېږي.
ډان ورځپاڼې هم راپور ورکړی چې د چهارشنبې په ورځ له دې مرکز څخه ۲۲ تنه تښتېدلي دي.
د چارواکو په وینا، په نیول شویو کسانو کې د ۸۶ تنو ویزې پای ته رسېدلې، ۱۱۶ هغه کسان دي چې د “افغان اتباعو کارت” لري، او ۲۹۰ نور د ملګرو ملتونو د کډوالو د لویې کمیشنرۍ (UNHCR) د راجستر سندونه لري.