تاند ( سه شنبه د عقرب ۲۹ مه) هرات کې د طالبانو سیمه ییز مسوولین وایي، چې په دې ولایت کې د نشه یي توکو د پرېښودو په ۴ زره بستریز روغتون کې تر ۱۱ میاشتنۍ درملنې وروسته ۱۷۰ تنه روږدي کسان روغ او خپلو کورنیو ته ستانه شوي دي.
سرچینه زیاتوي، چې دغو روږدو کسانو کې یوازې د هرات نه؛ بلکې د هېواد د نورو ولایتونو اوسېدونکي هم شامل دي.
په ورته وخت کې هرات کې د طالبانو د نشه یي توکو پر وړاندې د مبارزې مدیریت وایي، چې په تېر یو کال کې په دغه روغتون کې د ۱۲ زره روږدو کسانو درملنه شوې ده.
ځایي خلک بیا بې روزګاري او نشه یي توکو ته اسانه لاسرسی د روږدو کسانو د زیاتوالي ستر لامل بولي.
دوی وایي طالبانو ته پکار ده چې د روږدو کسانو تر درملنې وروسته دوی ته کاري زمینې هم برابرې کړي، چې بیا پر نشه روږدې نشي.
دوی وایي ډېری له نشې ژغورل شوي کسان بیا د بې روزګارۍ له امله نشو ته مخه کوي، چې دا دردوونکی حالت دی او حاکم نظام یې حل لار لرلی شي.