تاند ( جمعه ـ د سنبلې ۲۳مه) طبیعي پېښو سره د چمتووالي په برخه کې د مبارزې ملي اداره په یوه خبرپاڼه کې وايي، چې له ترکمنستان څخه یې تر ۹۳۰ ټنه څخه زیات د خوراکي او غیر خوراکي توکو مرسته ترلاسه کړه.
خبرپاڼه کې راغلي چې، په دې مرسته کې ۱۹۸ ټنه غنم، ۱۵ ټنه غیر الکولي مشروبات او د ميوې اوبه، ۲۰۰۰ قوتۍ د ماشومانو خوارکه، ۵ زره شیریني او بیسکویت، ۱۹۵ ټنه کیمیاوي سره، ۱۷۴ ټنه ډيزل تیل، ۱۶۸ ټنه پټرول تیل او ۱۸۳ ټنه سیمنټ شامل دي.
په ورته وخت کې د ترکمنستان د بهرنیو چارو وزارت په یوه خبرپاڼه کې ویلي چې، دا مرسته یې د ټاپي پروژې د پيل، برښنايي لینونو، ترانسپورت او په پوله کې د افغانستان او ترکمنستان ترمنځ د ښو اړیکو په پار ترسره کړې ده.
ترکمنستان داسې مهال افغانستان سره د خوراکي او غیر خوراکي توکو مرسته کوي چې، د تېرې چهارشنبې په ورځ د ټاپي پروژې د کار د پيل په پرانیسته کې د ترکمنستان ولسمشر وویل، د دغو مهمو پروژو تطبیق نه یوازې د ترکمنستان او افغانستان د ګټو لپاره، بلکې د سیمې د ګټو لپاره هم مهم دی.
قربان قُلي بیردي محمدوف ویلي وو یادې پروژې د دواړو هیوادونو ترمنځ په اړیکو کې به یوه نوی باب پرانیزي.
هغه زیاته کړې وه چې د افغانستان او ترکمنستان تر منځ اړیکې تاریخي دي، متقابل درناوی، مساوات، ورورولي او ښه ګاونډیتوب د دواړو هیوادونو تر منځ یو مهم مثال دی او په راتلونکې کې به دا اړیکې نورې هم پراخې شي، او همداراز د ترانسپورت، مخابراتو، انرژۍ او بریښنا په برخو کې د دواړو هیوادونو همکاري د افغانستان لپاره ګټوره ده او د دواړو هیوادونو ترمنځ د یوه نوي باب د پرانیستلو او حقیقي دوستۍ یوه بیلګه ده.
د یادونې ده چې د تېرې چهارشنبې په ورځ د اروپايي ټولنې د کړکېچ د مدیریت کمېشنر یانز لنارچیچ هم له افغانستان سره د شاوخوا ۱۰۰ ټنو اړینو طبي توکو د مرستې ژمنه اعلان کړه.
نوموړي ویلي وو چې دا مرسته چمتو ده او ژر به افغانستان ته ولېږدول شي.