تاند (سې شنبه، د سنبلې ۱۹ مه) په هند کې د افغانستان په کوربه توب د افغانستان او نیوزیلنډ د یوازینۍ ټیستلوبې دوهمه ورځ هم ضایعه شوه.
سره له دې چې نن ډېره هڅه وشوه چې میدان وچ کړل شي خو د ورښت او د میدان د لندوالي له کبله بالاخره د ماسپښین په ۳ بجې امپایرانو پرېکړه وکړه چې نن هم لوبه وځنډول شي.
اوس ټاکل شوې ده چې دا پنځه ورځنۍ سیالي، د ۵ ورځو پر ځای په ۳ ورځو کې وشي.
د دې لوبې ځنډېدا په ځانګړي ډول د افغانستان لپاره ښه خبر په دې نه دی چې افغان لوبډله د ټیست سیالیو ډېر لږ چانس مومي.
له همدې کبله د کرکټ ځینو نظرخاوندانو ویلي دي چې افغانستان ته دې یو بل چانس ورکړل شي چې پوره ټیستلوبه وکړای شي.
د هوا پېژندنې اټکل ښيي چې سبا به اسمان شین وي. د هند ګرېټر نویدا لوبغالی به هم مسابقې ته چمتو وي. په پام کې ده چې د هند په وخت د سهار په ۹ بجې پچه واچول شي.
نن د نیوزیلنډ لوبغاړو د مسابقې پیچ یا ویشتنځای ته نژدې تمرین وکړ خو د افغانستان لوبغاړي په میدان کې ښکاره نه شول.