تاند (شنبه، د سرطان ۳۰ مه) د افغانستان مشهور لرغون پېژندونکی پروفیسر زمریالی طرزی د ۸۵ کلونو په عمر وفات شو.

د ارواښاد طرزي د کورنۍ غړي وايي چې نوموړی د جمعې په ورځ د سرطان په ۲۹مه د فرانسې په ستراسبورګ ښار کې په حق ورسېد.

پروفیسر طرزي په ۱۹۳۹ م کال کې په کابل کې زېږېدلی دی. د کابل د استقلال لېسې له پای ته رسولو وروسته د لوړو زده کړو لپاره فرانسې ته لاړ او د سټراسبورګ په پوهنتون کې یې د دوکتورا تر کچې زده کړې وکړې.

ده په په ۱۹۷۲ م کال د لرغونپوهنې په برخه کې په فرانسه کې دوکتورا واخیسته.

د دوکتورا له پای ته رسولو وروسته هیواد ته راستون شو، د افغانستان د لرغون پېژندنې او د تاریخي ابدو عمومي ريیس وګومارل شو.

هغه د لرغون پېژندنې په برخه کې څو اثار لیکلي چې په کتابي بڼه چاپ شوي دي. همداراز يې تر ۶۰ ډېرې علمي مقالې کښلي دي.

ارواښاد طرزي د سټراسبورګ په پوهنتون کې هم تدریس کاوه.

ډاکتر طرزي له ډېرو کلونو راهیسې په جلال اباد په اډې، بامیان او د تخار په آی خانم کې د بودايي اثارو په کیندلو بوخت و. ښاغلي طرزي د خپلو څېړنو په پایله کې د فرانسې له حکومت څخه د (شیویلیر دی پالم دی اکوډیمیک) میډال او د یونان له حکومت څخه د سینټ کنستانتین د سرو زرو عالي مډال ترلاسه کړی دی.

هغه په ​​یونیسکو کې د ختیځ لرغونپوهنې مشر هم پاته شوی دی. ډاکتر طرزي تر دې مخکې د افغانستان د لرغونپوهنې د رئیس په توګه کار کړی دی.