تاند (جمعه، د جوزا ۱۸ مه) د طالبانو حکومت له جرمني څخه وغوښتل چې له خپلې خاورې درېیم هیواد ته افغانان ونه باسي، او په نورمال ډول دې د قونسلګرۍ له لارې مسله حل کړي.
د جرمني صدراعظمې اولاف شولز د پنجشنبې په ورځ ژمنه وکړه چې جرمني به افغانستان او سوریې ته د کډوالو د بېرته ستنولو لړۍ پیل کړي. ده دا خبره وروسته له هغو نادریو وکړه چې د یوه افغان کډوال له لوري په جرمني کې یو پولیس ووزل شو او ۵ تنه سیاسي فعالان ټپیان شول.
د بهرنیو چارو وزارت ویاند عبدالقهار بلخي په یوه بیان کې ویلي چې دغه وزارت له جرمني څخه د افغانانو د ایستلو پرېکړه څاري.
هغه هیله څرګنده کړه چې دواړه هیوادونه د ډیپلوماټیکو چاینلونو له لارې د اتباعو د حقونو د ساتنې لپاره دا مسله په داسې ډول اداره کړي چې افغانان په یوه یا بله پلمه له نامعلوم برخلیک سره مخامخ نه شي او یا د ټولو کنوانسیونونو خلاف درېیم هیواد ته ونه سپارل شي.
هغه زیاته کړه: «د افغانستان اسلامي امارت له آلماني چارواکو څخه غوښتنه کوي چې دغه موضوع د قونسلګرۍ د عادي مصروفیت او د دوه اړخیزې موافقې پر بنسټ د یوه مناسب میکانیزم له لارې حل کړي.»
پرون صدراعظم شولز د خپل هیواد پارلمان ته وویل، د جرمني د کورنیو چارو وزارت داسې پلانونه جوړوي چې له مخې یې خپلو هیوادونو ته د بهرنیو هیوادونو د خطرناکو کسانو او جدي مجرمانو بیرته استول آسانه شي، حتی که هغوی د جګړې له سیمو او یا د افغانستان او سوریې په څیر هیوادونو څخه هم راغلي وي چې استبدادي رژیمونه پرې واکمن دي. «دا ډول مجرمان باید وشړل شي.»
د یوې سپږې له پاره ټول پوستین ته اور اچوي .
جرم یوه شخصي موضوع ده ، په هېڅ صورت د هغه جزا نورو ته نه انتقالیږي .
څوک چې مجرمین او جنایتکاران دي ، د جرم د اثبات په صورت کې مرتکبین د ترټولو سختې سزا مستحق دي .
اما بې ګناه ، معصوم او مظلوم انسانان باید د هغوی په جرم ونه کړول شي .