تاند (سې شنبه، د ثور ۱۸ مه) د فوټبال د نړیوال فدراسیون په درجه بندۍ کې د افغانستان د فوتسال د هلکانو او نجونو لوبډلو ته په ترتیب ۳۰ او ۴۸ رتبې ورکړل شوې.
دا لومړی ځل دی چې فیفا یا د فوټبال نړیوال فدراسیون د فوتسال د لوبډلو درجه بندي کوي.
فیفا پرون (دوشنبې) د ښځو او نارینه وو د فوتسال لوبډلو درجه بندۍ اعلان کړې.
د فیفا له درجه بندۍ سره سم، د برازیل د فوتسال د نارینه وو او هم د ښځینه وو ملي لوبډلو ته په نړۍ کې لومړي ځایونه ورکړل شوي دي.
د افغانستان د ښځو د فوتسال ملي لوبډلې، چې له هیواده دباندې ده، په دې درجه بندۍ کې د نړۍ په ۶۹ هیوادونو کې ۴۸ ځای خپل کړی دی. دا په داسي حال کې ده چې څرګنده نه ده چې د افغانستان د ښځینه وو د فوتسال لوبډله به څومره وخت نور وپايي ځکه چې لوبغاړې یې په بیلابیلو هیوادونو کې مېشتې دي او د طالبانو له واک ته رسیدو وروسته په افغانستان کې نورې لوبغاړې د ملي ټیم لپاره نه شي روزل کېدای.
د افغانستان د نارینه وو د فوتسال لوبډله په وروستیو کې په اسیايي جام سیالیو کې ښه وځلېده او په لومړي وار یې د فوتسال نړیوال جام ته لاره وموندله.
له کرکټ وروسته فوتسال دوهمه ټیمي لوبه ده چې افغانستان پکې نړیوال جام سیالیو ته وځي.