تاند: (۴ شنبه، د ثور ۵ مه) د طالبانو د ریاست الوزراء د سیاسي مرستیال مولوي عبدالکبیر دفتر په یوه اعلامیه کې ویلي، چې د افغانستان لپاره د روسیې د ولسمشر ځانګړي استازي ضمیر کابلوف له مولوي کبیر سره لیدلي.
سرچینه زیاتوي: ضمیر کابلوف وویل، چې مسکو په ملګرو ملتونو کې د طالبانو استازي ته د څوکۍ د ورسپارلو غوښتونکی دی.
د اعلامیې له مخې نوموړي دا هم زیاته کړه، چې د طالبانو رژیم سره به د روسیې مثبتې اړیکې دوام ولري او روسي پانګوال په افغانستان کې پانګونې ته لېواله دي.
د طالبانو اعلامیه کې دا هم ویل شوي، چې د روسیې استازي له داعش او نشه يي توکو سره د مبارزې په برخه کې د دوی هڅې وستایلې او د دواړو هېوادونو ترمنځ یې د اړیکو په پراختیا او د همکاریو په دوام ټینکار وکړ.
ویل شوي، چې مولوي عبدالکبیر د افغانستان په اړه د مسکو له دریځ څخه هرکلی او له مرستو یې مننه کړې.
سیاسي مرستیال له افغانستان سره په سیاسي، فرهنګي او د بنسټونو رغولو په برخه کې د روسیې د مرستو د اړتیا یادونه وکړه او ویې ویل، چې د کابل او مسکو ګډې هڅې کولای شي په سیمه کې د ګواښونو مخه ونیسي.
هیله څرګنده کړه، چې په مسکو- فارمټ کې طالبانو ته د افغانستان په استازیتوب رسمي غړیتوب ورکړل شي.