په ترکیه کې یو بل افغان په بې رحمۍ وژل شوی، پولیس یې د قاتل د نیولو ادعا کوي

تاند (یکشنبه، د ثور ۲ مه) د ترکیې پولیس وايي، هغه کس یې نیولی چې د دغه هیواد په کایسري (قیصري) ښار کې د یوه افغان په بې رحمانه قتل کې په لاس لرلو تورن دی.

د پولیسو په وینا یو ۲۸ کلن افغان ځوان د اپریل په ۱۸ مه (پنجشنبې) د ملک ګازي په مېنه کې په چاړو وژل شوی دی.

راپورونه وايي چې د دغه افغان قاتل یو ۳۹ کلن ترک دی او افغان یې وروسته له هغه د چاړو په ګوزارونو وژلی چې له هغه سره یې لفظي شخړه وکړه.

د ترکیې رسنۍ د پولیبسو په قول وايي چې قاتل یې له پېښې دوې ورځې وروسته نیولی دی.

تر دې مخکې په ترکیه کې د یوه افغان کارګر د خورا بې رحمانه وژنې موضوع رسنیزه شوه.

د ۲۰۲۳ د نوومبر په ۹ مه د وزیرمحمد په نوم یو افغان،ؤ چې د سکرو په کان کې یې کار کاوه، د کان د خاوند له لوري په دې خاطر ووزل شو چې د بدن غړي ورڅخه واخلي.

د وژل شوي افغانمېرمن رسنیو ته ویلي و چې د خاوند د بدن غړي یې ایستل شوي او دا خبره عدلي طب ثابته کړې ده.

د وزیر محمد جسد له وژل کېدو یوه ورځ وروسته د نومبر په ۱۰مه په کرات سیمه کې وموندل شو. ده د زونګلداګ د سکرو په کان کې کار کاوه.

قمرګل ویلي چې د کار مالک د دې خاوند او نورو کارګرو ته ویلي وو چې د پښتورګي په بدل کې ورته ۲۰ زره ډالره ورکوي ځکه چې پلار یې پښتورګي ته اړتیا لري.

د نوموړي د وژلو په تړاو د هغه د کار د مالکانو په ګډون ۶ کسان نیول شوي وو چې وروسته بیا څلور تنه د قضايي کنټرول په شرط خوشې شول.

د وزیر محمد مدافع وکیل شکر، ترکي رسنیو ته ویلي: “د هغه مخ، لاسونو او پښې هیڅ نه وو سوځېدلي چې هویت یې ونه پېژندل شي. د هغه هویت د هغه د مخ او د ګوتو د نښو په واسطه پېژندل کېدای شي، خو بدن يې نور په بشپړه توګه سوځېدلی دی.”

د وژل شوي کډوال وکیل همدا شان زیاته کړې: “له دې امله چې د وزیر محمد چپ پښتورګی د پېژندلو وړ نه دی، ښايي له سوځولو مخکې قاچاق شوی وي.”

مخکې د عدلي طب ترلاسه شوي راپور یوازې دا ښودلې وه چې پر هغه پټرول اچول شوي او بیا سوځول شوی دی.