تاند (یکشنبه، د حوت ۲۰ که) په کابل کې د طالبانو د واکمن رژیم ذبیح الله مجاهد، د پاکستان له نوي حکومت څخه د دوی د رژیم غوښتنې په ډاګه کړې
نوموړي د طالبانو تر واک لاندې د افغانستان ملي راډیو تلویزون ته وویل، چې د دوی اصلي غوښتنه د پاکستان له نوي حکومت څخه دا ده، چې له دغه هېواده د افغان کډوالو د ایستو په برخه کې نرمښت راولي.
هغه دغه راز وویل، چې تمه لری یاد شوی حکومت د دواړو هېوادونو ګټې په نظر کې ونیسي، خو په ډاګه یې نه کړه چې له دغو ګټو څخه یې په مشخصه توګه تمه څه ده؟
د افغانستان – پاکستان تر منځ د سوداګرۍ غوړیدل او وده هم د طالب ویاند له نورو مهمو غوښتنو څخه ده.
د پاکستان نوي حکومت له طالب رژیم سره د خپلو اړیکو په تړاو څه نه دي ویلي.
د پاکستان نوي صدراعظم شهباز شریف د لوړې له مراسمو مخکې په یوه وینا کې یو ځل بیا د مخکیني حکومت د دریځ په دوام ویلي وو، چې د افغانستان له خاورې دوی ته د ترهګرۍ خطر پېښ دی.
دا ډول ادعاوې مخکې د طالب چارواکو لخوا بیا- بیا رد شوې دي.