تاند: ( چار شنبه، د سرطان څوارلسمه) د ملګرو ملتونو د وياند مرستيال “فرحان حق” ویلي، چې د افغانستان لپاره د دغه سازمان د نوې ستراتيژۍ پر بنسټ، د ښځو او نجونو، قومي او مذهبي لږکيو او داخلي بې ځايه شويو مسايلو ته به د ملګرو ملتونو لومړيتوب وي.
هغه زیاته کړه، دا ستراتیژي په دریو ګډ لومړیتوبونو تمرکز کوي، چې د اړینو خدماتو دوام، د اقتصادي او معیشت فرصتونو رامینځته کول، ټولنیز یووالي، د جنسیت مساوات او بشري حقونه پکې شامل دي.
له بلې خوا د طالبانو د اقتصاد وزارت مرستیال عبداللطیف نظري د دغې تګلارې هرکلی کړی او ویلي یې دي: «ملګري ملتونه د افغانستان د خلکو په ملاتړ کې مهم رول لوبولی شي. موږ هم له دې سازمان او په ټوله کې له نړیوالې ټولنې سره ښه او ستراتیژیک تعامل غواړو.»
د افغانستان د اقتصادي مسایلو یو شمېر کارپوهان په دې باور دي چې ملګري ملتونه کولای شي د تلپاتې سولې د ټینګښت په برخه کې له افغان ولس سره مرسته وکړي.
د طالبانو ځینو منتقدانو بیا په افغانستان کې د ملګرو ملتونو رول تر ډېره د طالبانو په ملاتړ څرخیدونکی بللی، خو د ملګرو ملتونو استازو د افغانستان د خلکو په ملاتړ او د واکمن رژیم په توګه طالبانو سره پر تعامل ټینګار کړی.