تاند: ( یکشنبه، د دلوې ۳۰ مه ) د طالبانو د رژیم د بهرنیو چارو وزارت په مونیخ کنفرانس کې د پاکستان د بهرنیو چارو وزیر بلاول بوټو د خبرو په اړه غبرګون وښود.
دغه وزارت په یوه اعلامیه کې ویلي: (( د بلاول بوټو د هغو خبرو هرکلی کوي چې سوله ییز افغانستان یې د سیمې د ثبات لپاره مهم بللی او غوښتنه یې کړې ده چې نړیواله ټولنه دې له افغان حکومت سره د ظرفیت لوړونې په برخو کې مرستې وکړي، کنګل شوې شتمني دې ازاده کړي، بانکي محدودیتونه دې لرې کړي او له افغانانو سره دې بشري مرستو ته دوام ورکړي.))
سرچینه د بلاول هغه څرګندونې له حقیقته لرې بولي، چې ګواکې ترهګرې ډلې ښايي له افغانستان څخه ترهګریز فعالیتونه وکړي او که نړیواله ټولنه دې مسئلې ته جدي پام ونه کړي نو د پاکستان په څېر به نه یوازې د افغانستان نږدې ګاونډیانو ته ګواښ شي، بلکې غرب ته به هم ګواښ وي ځکه افغان حکومت لا تر اوسه منظم امنیتي ځواکونه نه لري.
طالبان وایي د سیمې او نړۍ هېوادونو ته یې په عمل کې ثابته کړې چې د منظمو او مجربو امنیتي ځواکونو پر مټ يې هیچاته اجازه نه ده ورکړې چې د افغانستان خاوره د چا پر ضد وکاروي.
د طالبانو د ادعا له مخې، د افغانستان امنیت اوس د نړۍ تر ډېرو هېوادو ښه دی.
د طالبانو په اعلامیه کې راغلي:((غواړو د سیمې او نړۍ د هېوادونو پام دې حقیقت ته راوګرځوو چې موږ هم د اشغال پرمهال او هم له فتحې وروسته د افغانستان او سیمې د امنیت ټینګښت لپاره کوټلي ګامونه پورته کړي دي، چې په پایله کې يې نه یوازې د افغانستان بلکې د ټولې سیمې امنیت سره مرسته کړې ده او د سیمې د امنیت پرخلاف تر ډېره د پخوانیو ګواښونو مخه نیول شوې ده.))
طالبانو وړاندې په خپله دغه اعلامیه کې زیاته کړې:((د پاکستان وروستۍ نا امني نوې نه ده بلکې د تېرو شلو کالو تسلسل دی. طالبان ټینګه اراده لري چې هیچا ته به اجازه ور نه کړي چي د افغانستان خاوره د نورو هیوادونو په ځانګړې توګه د ګاونډیانو پر ضد وکاروي. همداراز پاکستان ته مشوره ورکوو چي په نړیوالو کانفرانسونو کې د شکایت پرځای دې دوه اړخیز مسایل مخامخ له افغان حکومت سره بحث کړي.))
پاکستان د طالبانو دغو څرګندونو ته بیرته ځواب نه دی ورکړی.
د پاکستان او طالبانو ترمنځ له څو میاشتو راهیسې ورته دیپلوماتیکې او په ځینو مواردو کې وسله والې ناندرۍ رامنځته شوي دي.
زه نه پوهېږم چې پنجابیان څنګه ځان ته دا حق ورکوي چې د بل هېواد په استازیتوب په نړیوالو محفلونو ، کنفرانسونو او غونډو کې د افغانستان د استازو پرځای خبرې کوي ؟ کله پښتانه بې کلتوره بولې ، کله زمونږ د بلاک شویو دالري سرمایو غم اخیستی وي او کله کله بیا د تروریزم او د هغو د خطرونو په هکله وړاندوینې کوي .
که د دوی مستعمره وي ، نو مخامخ دې اعلان وکړي چې ټوله نړۍ پرې پوه شی . که د افغانستان خارجي او د باندېنیو چارو سیاست د دوی په انحصار کې وي ، بیا هم نړیوال باید پوه شي چې نور هېوادونه حق نه لري د پنجاب له اجازې پرته له افغانانو سره خبرې وکړي .
او که ط ځانونه خپلواک بولي یا افغانان خپل هېواد مستقل بولي ، نو بیا دوی دا حق نه لري ، د افغانانو د سرنوشت په هکله ځانونه په تکلیف کړي . افغانان پوه شه او کار یې .