تاند( چار شنبه ، د اسد ۱۲ مه) د امريکا متحده ايالاتو د ولسمشر جوبایډن نیږدې کسانو پولیټیکو رسنۍ ته د طالبانو د ادارې په اړه د بايډن حکومت په نوي دریځ خبرې کړي دي.
دغو سرچينو ويلي،چې امريکا د القاعدې شبکې مشر ايمن الظواهري ته د طالبانو د ادارې له لوري په کابل کې پناه ورکول غندي او له دې ډلې څخه به حساب وغواړي.
يوه پخواني امریکايي مقام ویلي، چې د الظواهري له وژل کيدو سره به ممکن امريکا د طالبانو د رژيم په غوښتنه د افغانستان بانک د کنګل کړې پانګې یوه برخه، چې تمه کیده د بشري مرستو لپاره له کنګل څخه وباسي، اوس ېې په اړه پریکړه بیرته واخیستل شي.
د طالبانو وياندويانو د الظواهري د وژل کیدو په اړه رسنیو ته هیڅ نه وايي.
دوی مخکې د کابل په وزير اکبرخان سیمه کې د امریکا د بې پیلوټه الوتکې د شنبې ورځې برید غندلی او د طالبانو او امریکا د دوحې د سولې تړون خلاف ګڼلی و.
ويل کيږي، چې د امریکا برید کې د الظواهري له وژل کيدو وروسته د طالبانو د لوی کندهار ( ملا برادر او ملا یعقوب ډلې) او لوېې پکتيا د طالبانو (حقاني شبکې) تر منځ اختلافات اوج ته رسیدلي.
مخکې د امريکا د بهرنيو چارو وزير انتوني بلینکن ويلي وو، چې الظواهري ته له پناه ورکولو سره، طالبانو د دوحې د سولې تړون نقض او له افغانانو او امريکايانو سره خیانت کړی دی.