تاند(چهارشنبه، د سرطان ۲۲مه) د ازبکستان د باندنیو چارو وزارت وايي، د افغانستان په اړه د نړیوال کنفرانس د دایرولو لپاره چمتووالی نیسي.
په هغه خبرپاڼه کې، چې دغه وزارت پر خپله رسمي ویبپاڼه خپره کړې، راغلي چې تاشکند په دوو اوونیو کې د څه باندې ۲۰ هیوادونو او نړیوالو موسسو استازي جرګه کوي چې په افغانستان کې د روان حالت په اړه خبرې وکړي.
د طالبانو حکومت هم تایید کړې چې د بهرنیو چارو وزیر امیرخان متقي په مشرۍ به د دوی پلاوی په دې ناسته کې ګډون وکړي.
تېره میاشت د ازبکستان د ملي امنیت سلاکار عبدالعزیز کاملوف په کابل کې د طالبانو د حکومت د ريیس الوزرا له مرستیال ملاعبدالغني ملابرادر سره په کتنه کې د دې غونډې په اړه خبرې کړې وې.
د دې غونډې د اجنډا په اړه ډېر څه نه دي ویل شوي او دا هم لا څرګنده نه ده چې کوم هیوادونه به دې کنفرانس کې ګډون کوي.