تاند(سې شنبه، د جوزا ۱۰ مه) په داسې حال کې چې ویل کېږي د پاکستان له پوځ او استخباراتو سره په کابل کې د پاکستاني طالبانو په خبرو کې پرمختګ شوی، پاکستاني چارواکو یوه قبایلي جرګه هڅولې چې کابل ته راشي او د پاکستاني طالبانو تحریک پخلاینې ته نور هم وهڅوي.

نیوز ورځپاڼې راپور ورکړی چې دا ۵۰ کسیزه جرګه به نن او یا هم سبا (چهارشنبه) په الوتکه کې کابل ته لاړه شي.

ورځپاڼې ته د جرګې غړیو ویلي چې دوی به د ټي ټي پي له مشرانو سره خبرې وکړي او پخلاینې ته به یې وهڅوي.

د ورځپاڼې له مخې، پخوانی سناتور مولانا صالح شاه د جرګې مشري په غاړه لري. په دې جرګه کې د جنوبي وزیرستان، شمالي وزیرستان، اورکزو، کورمې، خیبر، مومند او باجوړ د اوو سیمو (پخوا دا ۷ قبایلي ایجنسۍ وې) او همداراز ملاکنډ استازي شامل دي.

نیوز ورځپاڼه وايي چې د جرګې غړیو تراوسه پورې د پاکستان له امنیتي چارواکو سره دوې غونډې کړي دي. دوی پېښور ته بلل شوي وو او پاکستاني چارواکو ته یې له ټي ټي پي سره د سولې د پروسې په اړه معلومات ورکړي وو.

د جرګې غړیو ویلي چې دوی له پاکستاني طالبانو غواړي چې وسله پر مځکه کښېږدي، خپلو کورونو ته راستانه شي او په پاکستان کې سوله ییز ژوند وکړي.

دوی د پاکستاني طالبانو د شرطونو په اړه څه ونه ویل.

پاکستاني طالبان له قبایلي سیمو د پاکستاني پوځ د وتلو، له خیبرپښتونخوا ایالت څخه د قبایلي سیمو د جلا کولو او شرعي نظام د نافذدو غوښتنه کوي.

له بلې خوا راپورونه وايي چې په افغانستان کې د افغان طالبانو په منځګړتوب د پاکستان د حکومت او د پاکستاني طالبانو د تحریک ترمنځ په خبرو کې پرمختګ شوی دی.

 په کابل کې د افغان طالبانو په منځګړتوب له څو اوونیو راهیسې د پاکستان د امنیتي او استخباراتي چارواکي له پاکستاني طالبانو سره په خبرو بوخت دي. د دغو خبرو په نتیجه کې لومړی د اختر په شپو ورخو کېژ اوربند وشو او وروسته تر نامعلومې مودې پورې اوږد کړای شو. اوس داسې راپورونه هم شته چې دواړو خواوو د اوربند پر دوام او د راتلونکې جون په نیمايي کې د خبرو د بل پړاو پر پیلولو سلا کړې ده.

د دوی وروستۍ خبرې د روانې اوونۍ په پای کې په کابل کې پای ته ورسېدې.