تاند(سې شنبه، د جوزا ۳) د هرات ځايي چارواکو د دې ولايت پر فصلونو د ملخانو د څو ورځینیو پرله پسې بريدونو خبر ورکړی.
د هرات د کرنې او مالدارۍ رياست لپاره د طالبانو رييس ويلي، چې د ملخانو دغه برید له څو ورځو راهيسې پیل شوی.
د هغه په وينا، د ملخانو د را پیدا کیدو اصلي دلیل له څو ورځو راهيسې لګیدلی توپان دی.
سرچینه زیاتوي، چې د ملخانو پر ضد یې په ځینو سیمو کې دوا شیندلې، چې د ملخانو د له منځه تلو سبب شوی.
له دې سره، په ځینو سیمو کې د ملخانو د بریدونو له امله د ډېرو کرنیزو فصلونو د زیانمنیدو خبر ورکړل شوی.
تر اوسه د دغو ملخانو د راتلو اصلي سیمه او دغه راز د متضرر شویو فصلونو اندازه نه ده په ډاګه شوې.
ځايي کروندګرو دوی سره د مرستو غوښتنه کړې ده.