تاند:( دوشنبه، د حمل ۲۹ مه) د طالبانو تر واک لاندې د افغانستان د پاسپورټ ریاست چارواکي وايي، په پام کې لري چې له دې وروسته هغو کسانو ته چې عمرونه یې له ۱۵ کلونو لوړ وي، لس کلن پاسپورټ ورکړي.
د دغه ریاست د چارواکو په خبره، هغه کسان چې عمرونه یې له ۱۵ کلونو کم وي، کولای شي چې پنځه کلن پاسپورټ ترلاسه کړي.
په ټولنیزو رسنیو کې يو شمېر افغانانو د دغه اعلان هرکلی کړی، خو ځينو نورو ويلي چې طالبان دې په داسې حالت کې چې هېواد د پاکستان له عملي اشغال څخه ځوریږي، په داسې اعلانونو عامه ذهنیت نه مصروفوي.
د پاکستان دغه بمبارۍ څو شپې مخکې وشوې، چې په خوست کې يې شاوخوا ۴۰ وزيرستاني کډوال او په کونړ کې د ماشومانو په ګډون د يوې کورنۍ شاوخوا ۵ غړي ووژل.
د طالبانو چارواکو تر اوسه په نرمۍ په دې اړه اعتراض کړی، چې د خلکو توند غبرګون سره مخ شوي دي.
پاکستان ادعا کوي، چې په دې بریدونو کې یې د پاکستان د تحريک طالبان غړي هدف کړي، خو ځایي خلکو یې ادعا بې بنسټه ګڼلې ده.
پاکستاني چارواکي په افغانستان کې د یادې ډلې د موجوديت او د پاکستان خلاف یې د فعالیتونو ادعا لري.
د طالبانو ځینو چارواکو له تحريک طالبان پاکستان سره خپل تړاو، ملاتړ او په افغانستان کې د موجوديت ادعاوې رد کړې وې.