تاند (سه شنبه، د اسد ۲۱) چین وايي د طالب بندیانو خلاصون به د حکومت او طالبانو تر منځ د باور فضاء پیاوړې کړي.
د چین د بهرنیو چارو وزارت ویاند یوې خبري غونډې ته په خپله وینا کې ویلي چې د افغانستان د سولې په مسئله کې د وروستیو پرمختګونو هرکلی کوي.
د نوموړي په خبره چين تل هڅه کوي د افغانستان د سولې په مسئله کې مثبت رول ولوبوي.
د چین د بهرنیو چارو وزارت همدا راز د لویې جرګې له پرېکړې چې د افغانستان حکومت به د طالبانو ۴۰۰ هغه بندیان چې سختې جنايي دوسیې لري د خلاصون هرکلی کړی دی او په خبره یې د دغو بندیانو خوشې کول به د دواړو لوریو تر منځ د باور فضاء رامنځته کړي.
چین دغه راز د افغانستان په حکومت او طالبانو غږ کوي چې په خپلو ژمنو عمل وکړي او په دې توګه به د سولې روانې هڅې یوې مثبتې پایلې ته ورسېږي.
چین پخوا هم د افغان سولې برخه کې د همکاریو ژمنه کړې وه.
د یو بل خبر له مخې د افغانستان لپاره د ایران ځانګړي استازي ابراهیم طاهریان ویلي، دوی تیار دي څو د بین الافغاني خبرو کوربه توب وکړي.
ښاغلي طاهریان د مشورتي لویې جرګې له پرېکړې هم هرکلی کړی دی او په خبره یې دایمي اوربند کولی شي په سیمه کې دایمي سوله رامنځته کړي.