د بند امیر او مس عینک د سیالۍ ګټونکی به پایلوبې ته ووځي
تاند- د شپږیزې لیګ د سیالیو په دوام کې به د چهارشنبې په ورځ بند امیر او مس عینک لوبډلې مخامخ شي او ګټونکی به یې په مستقیم ډول بایلوبې ته بریالی شي.
د افغانستان د کرکټ بورډ په وینا د دې سیالۍ بایلونکی به دوهم چانس هم ولري.
که د سبانۍ مسابقې په پایله کې هر ټیم وبایلله د پنجشنبې د ورځې په دوهم کوالیفایر کې د چهارشنبې د ورځې له ګټونکي سره مخامخ کېږي او ګټونکی به یې پایلوبې ته لار ومومي.
د شپږیزې پایلوبه به د جمعې په ورځ وي او د افغانستان کرکټ بورډ د کرکټ سیالیو پر مینه والو ږغ کړی چې سر له اوسه د پایلوبې لپاره ټکټونه واخلي.
