مشعل له پاکستان سره د مسابقو دفاع وکړه
تاند- د افغانستان د کرکټ بورډ مشر عاطف مشعل نن /سې شنبه/ له پاکستان سره د افغانستان د کرکټ د ملي ټیم د مسابقو دفاع وکړه.
ګومان کېده چې ښاغلی مشعل به د هغو انتقادونو په وړاندې، چې په وروستیو ورځو کې په ډله ییزو رسنیو کې شوي دي، له پاکستان سره د مسابقو په اړه له خپلې موافقې تېر شي.
پرون د کرکټ بورډ چارواکو وویل چې تراوسه پورې له پاکستان سره د مسابقو پرېکړه نهايی شوې نه ده.
ښاغلي مشعل هم دې موضوع ته اشاره وکړه، ویې ویل چې له پاکستان سره د مسابقو پر اجنډا یې سلا کړي خو موافقه لا لاسلیک شوې نه ده.
ده وویل چې له غور او څېړنې وروسته به موافقه لاسلیک شي.
مشعل او د پاکستان د کرکټ بورډ مشر شهریار خان د روانې اوونۍ د شنبې په ورځ په لاهور کې یوې خبری غونډې ته وویل چې د دوو هیوادونو د ملي لوبډلو ترمنځ به دوې شل اوره مسابقې په جولای او اګست میاشتو کې په افغانستان او پاکستان کې کېږي.
خو شکرالله عاطف مشعل نن وویل، چې له پاکستان سره د افغانستان د کرکټ د ملي ټیم مسابقې د افغانستان په ګټه دي او دی له ټولو افغانانو غواړي سپورت ته د لوبو په سترګه وګوري.
له پاکستان سره د افغان ټیم د مسابقو مخالفان وايي چې پاکستان په نړۍ کې منزوي شوی او که افغان ټیم ورسره لوبې وکړي د دغه هیواد د انزوا له کمېدو سره مرسته کوي.
دوی دغه راز وايي چې پاکستان د افغانستان په چارو کې په ښکاره لاسوهنه کوي، افغانستان ته ترهګر رالېږي، د اقتصادي فشار په خاطر ترانزیتي لارې بندوي نو باید له پاکستان سره مسابقې هم ونه شي.
مشعل او له پاکستان سره د سیالیو پلویان وايي، پاکستان د کرکټ د نړیوالې شورا بشپړغړیتوب لري؛ له دغه هیواد سره مسابقه د افغانستان د ټیم د درجه بندۍ یا رینک له لوړېدو او په نهایت کې د بشپړ غړیتوب له ترلاسه کولو سره مرسته کولی شي.
دغه راز داسې اندېښنې هم شته چې که له پاکستان سره د کرکټ په برخه کې مخالفت وشي ممکن دا هیواد تروریستي ډلې په افغانستان کې د کرکټ پر لوبغاړو او نندارچیانو حملو ته وهڅوي.
