د خوست د کرکټ لوبغالی د زرګونو خلکو په ګډون پرانستل شو
تاند- په خوست کې د کرکټ لپاره نوی جوړ شوی لوبغالی په داسي حال کې پرانستل شو چې په زرګونو خوستیان یې د پرانستنې په مراسمو کې حاضر ول.
دې مراسمو ته خلک د افغانستان د ملي لوبډلې د دوستانه سیالۍ لیدو ته راغلي ول. د نندارچیانو شمېر دومره زیات وو چې اکثره خلک په دې خاطر چې په لوبغالي کې ځای نه و، بېرته خپلو کورونو ته لاړل.
د ولسمشرۍ د انتخاباتو د کمپاین له وخته راوروسته دومره زیات خلک په خوست کې کوم مناسبت ته نه ول راغونډ شوي.
د خوست والي حکم خان د لوبغالي په پرانستونکو مراسمو کې وویل، نن په دې مراسمو کې د زرګونو تنو ګډون د دې ښکارندویي کوي چې خوست امن دی او جنګ ځپلي افغانان خوشالي او سوکالي غواړي.
د خوست د والي په وینا دا لوبغالی، چې په ۱۲ نیم هکتاره مځکه کې د جرمني په مرسته په ۶۲ ملیون افغانۍ جوړ شوی د ۵ زره تنو نندارچیانو ظرفیت لري خو د خوست خلک له سپورت سره زیاته مینه لري نو پکار ده چې تر دې لوی لوبغالی ولري.
ده غوښتنه وکړه چې په لوبغالي کې دې د نندارچیانو د ځاییدو ظرفیت زیات شي او ورسره دې یو جومات او د موټرو لپاره پارکینګ جوړ شي.
د والي د څرګندونو په ځواب کې د کرکټ بورډ عمومي رييس عاطف مشعل ژمنه وکړه چې د خوست د خلکو د دغو غوښتنو د پوره کولو لپاره به ترخپله وسه هلې خلې وکړي.
ده هیله څرګنده کړه چې د دغه لوبغالي ظرفیت به، چې اوس ۵ زره تنه پکې ځاییږي، ۳۰ زرو ته زیات کړي.
د لوبغالي له پرانستو وروسته د ملي لوبډلې ترمنځ د اصغر ستانکري او نوروز منګل په کیپتانیو شل اووریزه سیالي وشوه.
دا لوبه د اصغر ستانکزي ټیم وګټله.
