اسمايي شاهین د غوره لیګ اتلولي وګټله
د فوټبال د غوره لیګ د سیالیو پایلوبه اسمايي شاهین ټیم دوه پر یو له میوند اتلانو وګټله.
اسمايي شاهین د لوبې په ۴۰ دقیقه لومړنی ګول وواهه.
میوند اتلانو لږ وروسته لوبه مساوي کړه. خو ډېر وخت نه و وتلی چې اسمايي شاهین بل ګول وواهه.
د پایلوبې لیدلو ته د افغانستان د حکومت د اجراییه رییس عبدالله عبدالله په ګډون یو شمېر چارواکو، د ملي شورا غړو او یو شمېر سیاستوالو تللي ول. د دې لوبې، چې د فوټبال فډراسیون په لوبغالي کې وشوه، نندارې ته ۷ زره تنه راغلي ول.
د لوبې له پیلېدلو یوه ورځ مخکې د فوټبال مینه والو ټول ټکټونه را نیولي و.
