په لالیګا لیګ کې ګراناد ریال بتیس لوبډله ۱-۰ په ګونډو کړه
د هسپانیا په مشهور لالیګا لیګ فوټبال سیالیو کې تر دې دمه ګرانادا لوبډله تر ټولو مخکښه ده. ګرانادا تېره شپه ریال بتیس ته یو پر صفر ماتې ورکړه او د جدول لومړي مقام ته یې ځان ورساوه.
ګرانادا په دغې سیالیو کې لس لوبې کړي، شپږ یې ګټلي، دوه یې بایللي او دوه یې مساوي شوي دي. په وروستیو شپږ لوبو کې یې څلور ګټلي، یوه یې بایللې او یوه یې مساوي شوې ده.
په دغې لیګ کې تېره شپه پنځه لوبې ترسره شوې، چې ریال سوسېداد په کې سلتا ویګو ته یو پر صفر ماتې ورکړه او جدول کې یې درېیم مقام ته ځان ورساوه.
په نورو لوبو کې ایسپانیول لیوانتې ته یو پر صفر، سیویا خطافې ته دوه پر صفر او اوساسونا ویلنسیا ته درې پر یو ماتې ورکړه.
په دغو سیالیو کې ټولې شل لوبډلې دي، چې اتلس لوبډلو په کې تر اوسه لس لس لوبې کړي؛ خو بارسلونا او ریال مادرېد په کې تر اوسه نهه نهه لوبې کړي دي.
