افغانستان هانګ کانګ ته په ۶ ویکیټونو او ۱۲ توپونو ماتې ورکړه
تاند- د افغانستان د کرکټ ملي ټیم د کرکټ په نړیوال شل اوریز جام کې نن دوهمه مسابقه وګټله.
د دې مسابقې پچه هانګانګي لوبغاړو ګټلې وه او بیټنګ هم دوی پیل کړ خو افغان باولرانو پرې نښودل چې زیاتې منډې وکړي.
د هانګ کانګ لوبغاړو د افغانستان ټیم ته ۱۱۷ منډې هدف وټاکه چې په روانو سیالیو کې تر ټولو ټیټ هدف و.
د افغانستان لپاره محمد نبي خورا ښه باولینګ وکړ. ده، چې د دې مسابقې غوره لوبغاړی شو، د هانګ کانګ ۴ لوبغاړي وسوځول.
دوه نور لوبغاړي راشید خان او ګلبدین نایب وسوځول.
خو حمید حسن، که څه هم څوک ونه سوځول مګر په ۴ اورونو کې یې ۱۷ منډې ورکړې چې تر نورو لوبغاړو کمې منډې وې. محمد نبي په ۴ اورونو کې نه یوازې ۴ لوبغاړي وسوځول بلکې ۲۰ منډې یې ورکړې چې له حمید حسن وروسته تر نورو کمې منډې دي.
د افغانستان تر ټولو مهمه او ټاکونکې لوبه به له زیمبابوې سره وي. اوس د دواړو ټیمونو امتیازونه یو شی دی. دواړو دوه – دوه ټیمونه مات کړي.
د افغانستان او زیمبابوې ټیمونه به د مارچ په دوولسمه (د شنبې ورځ) سره مخامخ شي. که هر ټیم وګټله، بل پړاو ته به لاره مومي.
