تاند (شنبه د چنګاښ/سرطان ۲۷مه) نن د جولای ۱۸مه د نېلسن منډېلا نړیواله ورځ ده.
ملګري ملتونه وایي، دغه ورځ د نېلسن منډیلا د ازادۍ، عدالت او برابرۍ لپاره د تلپاتې مبارزې د درناوي فرصت دی.
د یاد سازمان په وینا، هر څوک کولای شي د منډیلا له میراث نه الهام واخلي او د ټولو لپاره د یوې ښې او عادلانه راتلونکي د جوړولو لپاره عملي ګامونه پورته کړي.
نېلسن مانډیلا د سویلي افریقا د توکمیز تبعیض (اپارتاید) پر ضد د مبارزې مخکښ و.
منډېلا د همدې مبارزې له امله ۲۷ کاله په زندان کې تېر کړل او وروسته یې د خپل هېواد د لومړي تورپوستي ولسمشر په توګه د ملي پخلاینې او برابرۍ لپاره کار وکړ.
اوس په ټولنیز ژوند کې منډیلا د ګڼو خلکو بېلګه ګرځېدلې او د دې لارې لارویان هڅه کوي، د خلکو ترمنځ عدالت او مساوات قایم کړي.