تاند (شنبه، د غبرګولي/ جوزا ۹ مه) هالنډ پرېکړه کړې چې د ډېری افغان ښځو او نجونو د پناه غوښتنې به ومني او د استوګنې جوازونه به ورکړل شي.
د هالنډ د کډوالۍ وزیر بارت وان دن برینک Bart van den Brink ویلي چې افغان ښځې او نجونې به «په ډېری مواردو کې» په هالنډ کې د پاتې کېدو اجازه ترلاسه کړي.
د نوموړي وزارت ویلي، دا پرېکړه وروسته له هغې وشوه چې د بهرنیو چارو وزارت چارواکو خبرداری ورکړ چې د طالبانو تر واک لاندې د ښځو او نجونو وضعیت لا ډېر خراب شوی دی.
په افغانستان کې په ۲۰۲۴ کال کې د «امربالمعروف قانون» نافذ شو، چې د ښځو د تګ راتګ ازادي یې محدوده کړه او د زدهکړې او پرمختګ فرصتونه یې نور هم کم کړل.
تر دې وړاندې هم هغه افغان ښځې چې نه یې شوای کولای د طالبانو قوانین ومني او د ځورونې له خطر سره مخامخ وې، د استوګنې جواز ترلاسه کولو ته ډېرې نژدې وې.
بارت فان دن برېنک ویلي چې د پخوانۍ تګلارې متن نور د افغانستان واقعي وضعیت نه منعکس کاوه، ځکه یې پالیسي بدله کړه.
د شمېرو له مخې، په ۲۰۲۵ کال کې ۷۶۰ افغانانو په هالنډ کې د پناه غوښتنه کړې وه، په داسې حال کې چې دا شمېر په ۲۰۲۴ کال کې ۴۹۰ او په ۲۰۲۳ کال کې ۶۷۰ تنه و.
دغه پرېکړه د هالنډ د بهرنیو چارو وزارت د یوه نوي مفصل راپور پر بنسټ شوې، چې د ۲۰۲۳ کال د جون او ۲۰۲۵ کال د اکتوبر ترمنځ وضعیت یې ارزولی دی.
د هالنډ د پناه غوښتنې پالیسي په ۲۰۲۵ کال کې، وروسته له هغې چې د کډوالو ادارې او د هغه مهال وزیر David van Weel د څو افغان ښځو د پناه غوښتنې غوښتنلیکونه رد کړل، له سختو نیوکو سره مخامخ شوه.
هغه مهال وان وېل ویلي و چې ښځې «په نظري ډول» کولای شي د طالبانو تر واک لاندې ژوند ته ځان عیار کړي.
خو د عامه غبرګونونو او حقوقي دعوو له زیاتېدو وروسته، د هالنډ د کډوالو ادارې په ۲۰۲۶ کال کې خپله پرېکړه بدله کړه او څلورو افغان ښځو ته یې د استوګنې جوازونه ورکړل.