تاند (شنبه، د سنبلې ۱۵) د پښتون ژغورنې غورځنګ مشر منظور پښتین ویلي، که محسن داوړ تر نن پورې خوشې نشي نو پاکستانی حکومت به د دوی له سخت غبرګون سره مخ شي.
پښتین پر خپله ټويټر پاڼه ليکلي، چې د پارلمان له یو غړي سره له داسې چلند معلومیږي، چې په پاکستان کې د پښتنو وضعیت څنګه دی.
د یاد غورځنګ مخکښ غړی محسن داوړ تېره ورځ داسې مهال د پاکستاني پولیسو له لوري ونیول شو، چې غوښتل په چمن کې له هغو کورنیو سره وګوري، چې تر لوی اختر وړاندې یې امنیتي ځواکونو د کورنۍ غړي ور وژلي وو.
په ورته مهال د بلوچستان د کورنیو چارو وزیر دغه کار د محسن داوړ د ښې ساتنې لپاره مهم بللی او زیاته کړې یې ده، چې د نوموړي په خلاف تر اوسه کومه قضیه نه ثبت شوې.
په پاکستان کې مېشت پښتانه له کلونو راهیسې د حکومت له ظلمونو شکایتونه لري.