د وېسټ انډیز کرېکټ ستوری پېښور ته ځي
د پېښور زلمي او د وېسټ انډیز د کرېکټ ملي لوبډلې یو وتلی ستوری ډرېن سمي به ډېر ژر پېښور ته سفر کوي. دا خبره د پېښور زلمي لوبډلې څښتن جاوېد اپرېدي په یوه ویدیویي پیغام کې کړې ده چې د ده پر ټوېټر پاڼه خپره شوې.
ښاغلي اپرېدي ویلي، د فبررورۍ میاشتې پر څلورمه نېټه به د خیبر پښتونخوا د ګورنر یا والي په دفتر کې د پېښور زلمي لوبډلې د نویو کالیو او نوې سندرې یا رسمي نغمې پرانیسته کېږي.
نوموړي ویلي، په همدې مراسمو کې به د یادې لوبډلې وتلی ستوری ډرېن سمي هم ګډون کوي.
د جاوېد اپرېدي په وینا، دوی له ډېرې مودې راهیسې هڅه کوله چې کرېکټ یو ځل بیا پاکستان ته ور ستون شي.
