نبي: موږ ټیستلوبو ته تیار یوو
تاند- محمد نبي، چې اوس د هند د غوره لیګ په سیالیو کې د حیدراباد د سن رایزرس لوبډلې لپاره لوبېږي، ټینګار کوي چې افغانستان د ټیست میچونو وړتیا لري او حاضر دی له لومړی درجه لوبډلو سره ټیستلوبې وکړي.
محمد نبي اې این آی خبري اژانس ته وویل«موږ چمتو یوو چې ټیستلوبې وکړو. موږ د لوړ معیار باولران او بټسمنان لرو.»
ښاغلی نبي او راشد ارمان د افغانستان یوازیني دوه لوبغاړي دي چې د لومړي ځل لپاره د هند په غوره لیګ کې، چې د نړۍ تر ټولو غوره لوبغاړي یې رایوځای کړي دي، لوبېږي.
دوی تېره میاشت په هغه مزایده کې په لوړه بیه واخیستل شول چې د هند په بنګلور کې وشوه.
راشد خان د حیدراباد د سن رایزرس لوبډلې په لومړۍ مسابقه کې ډېر ښه وځلېد، د مقابل ټیم دوه تکړه لوبغاړي یې وسوځول.
محمد نبي اې این آی (ANI) ته په ځانګړې مرکه کې د هند د غوره لیګ سیالۍ د ځان او راشد خان ارمان لپاره ستر چلینجونه وبلل خو ویې ویل چې دا سیالۍ د دوی لپاره ښه فرصت برابروي چې نړیوالو ته وښيي چې افغانستان ښه استعدادونه او تکړه کرکټران لري.
نبي وویل چې له دې لوبو خوند اخلي.
