آی سي سي: هند کرکټ بورډ د مالیې په ورکړه کې پاتې راغلی
د کرکټ نړیواله شورا وايي د ۲۰۲۱ م کال شل اوریز جام لپاره د هندوستان کرکټ بورډ د مالیې په ورکړه کې پاتې راغلی او ښایي د یاد شل اوریز جام کوربتوب له هندوستان څخه واخېستل شي.
تمه ده چې هندوستان د ۲۰۲۱ م کال شل اوریز جام کوربتوب وکړي، هندوستان هېواد کې د کرکټ مینوال او ننداره کوونکي خورا زیات وي؛ نو ځکه یې بیا ګټه هم زیاته وي.
خو د کرکټ نړیوالې شورا ویلي، چې د هندوستان کرکټ بورډ د ۲۰۲۱ م کال شل اوریز جام لپاره د تړون مالیاتي سیستم نه دی صفا کړی او ښایي چې د جام د کوربتوب حق ترې هم واخېستل شي.
۲۰۱۶ م کال کې هم هندوستان د نړیوال شل اوریز جام کوربتوب کړی؛ د هغه جام اتلولي ویسټ انډیز اخېستې وه.
له ۲۰۱۶ م کال راهیسې تر دې دمه د نړیوال شل اوریز جام ترسره کېدل نه دي ډاډمن شوي.
د کرکټ نړیواله شورا وایي چې د مالي ستونزو له امله یې ونشو کولای چې له ۲۰۱۶ م کال څخه تر ۲۰۲۰ م کال پورې نړیوال جام ترسره کړي.
۲۰۲۰ م کال کې د شل اوریز کرکټ جام کوربتوب ته اسټرالیا غاړه اېښې؛ خو د کرونا ویروس له امله دا جام هم له نامعلوم برخلیک سره مخ دی.
