تاند/ شنبه د وږي ـ سنبلې ۷مه/ افغانستان کې د طالبانو د حکومت د ټولګټو وزارت خبر ورکړی، چې په تېره زمري میاشت کې یې د اوسپنې پټلۍ له لارې ۷۰۴ زره او ۳۰۰ مټریک ټنه انتقالات کړي دي.
یاد وزارت ویلي، چې دغه انتقالات د حیرتان، اقینې، تورغونډۍ او خواف ـ هرات له لارو شوي دي.
د وزارت معلوماتو له مخې، په همدې موده کې ۳ زره او ۷۵۱ ټنه ګاز لرونکې نوشابې هم صادرې شوې دي.
د ټولګټو وزارت ویلي، چې د لا ډېرو انتقالاتو لپاره د مناسبو شرایطو برابرولو او سوداګرو ته د اسانتیاوو رامنځته کولو په برخه کې هڅې روانې دي.
اقتصاد پوهان وایي، د اقتصادي ارزښت له پلوه، د اوسپنې پټلۍ له لارې د ۷۰۴ زره او ۳۰۰ مټریک ټنه توکو انتقال د افغانستان د سوداګرۍ او ترانزیټ لپاره د پام وړ پرمختګ بلل کېږي.
دوی زیاتوي رېلپټلۍ د اوږده واټن پر مهال د مالونو د انتقال لګښت راکموي، د لویو محمولاتو د لېږد ظرفیت لوړوي او افغانستان له سیمهییزو بازارونو او د منځنۍ اسیا، ایران او نورو هېوادونو له ترانزیټي شبکو سره نښلوي.