تاند/شنبه د وږي ـ سنبلې ۷مه/ د لغمان سیمهییز چارواکي وايي، چې د یوې ریکشا د ګاز ډبې د چاودنې له امله د مهترلام ښار کې ۱۴ ملکي وګړي ټپیان شوي دي.
لغمان کې د طالبانو د حکومت د والي ویاند عبدالمالک نیازي ویلي، دغه پېښه پرون جمعه مازدیګر شاوخوا پنځه بجې د مهترلام ښار له ګڼې ګوڼې ډکه رحماني څلورلاره کې شوې ده.
د نوموړي په وینا، ټپیان پر وخت د مهترلام ولایتي روغتون ته انتقال شوي دي.
د روغتون مسوولانو هم ویلي، چې یو شمېر ټپیان له لومړنۍ درملنې وروسته له روغتون رخصت شوي او خپلو کورونو ته ستانه شوي دي.