تاند (پنجشنبه د اسد/زمري لومړۍ) د جرمني د هسن ایالت د کورنیو چارو وزارت اعلان کړی چې له دغه ایالت څخه د افغانانو د بېرته ستنولو پروسه ممکن زیاته شي.
د ایالت چارواکي وايي چې، راتلونکي اوونۍ به یوازې مجرمین نه بلکې نور هغه کسان هم وباسي چې، امنیتي ګواښ ګڼل کیږي.
د هسن ایالت د کورنیو چارو وزیر رومان پوزک زیاته کړې، هغه خلک چې جرمي مخینه لري لاهم به د ایستلو د لېست په سر کې وي؛ خو هغه افغانان چې باید د جرمني قانون له مخې له هېواده ووځي ممکن هم په دې پروسه کې شامل شي.
د هس ایالت د چارواکو په وینا، د دې اقدام هدف د کډوالۍ قوانین پلي کول او د هغو خلکو برخلیک ټاکل دي چې په جرمني کې د پاتې کېدو حق نه لري.
دا پرېکړه وروسته له هغه کیږي چې د جرمني فدرالي حکومت د افغانانو د ایستنې لپاره نور قانوني اساسات چمتو کړل.
په ورته وخت کې، د هسن د کډوالو شورا پر دې پالیسۍ نیوکه کړې او ټینګار یې کړی چې، د خلکو د بېرته ستنولو پرمهال باید په افغانستان کې امنیتي شرایط او د بشري حقونو وضعیت هم په پام کې ونیول شي.
جرمني له کلونو راهیسې د لوی شمېر افغان کډوالو کوربه توب کوي.
د هغو کسانو د بېرته ستنولو مسله چې د استوګنې غوښتنلیکونه یې رد شوي یا اړ دي چې له المان څخه ووځي، د هېواد د کډوالو په پالیسۍ کې یوه جنجالي مسله ده.