تاند (سې شنبه، د غويي/ ثور لومړۍ) د افغانستان د کرکټ پخوانی تکړه توپاچوونکی شاهپور ځدراڼ د سختې ناروغۍ له امله د ژوند له جدي ګواښ سره مخامخ دی او دا مهال د هند په پلازمېنه نوي ډیلي کې تر درملنې لاندې دی.
د راپورونو له مخې، هغه په یوې نادرې او خطرناکې ناروغۍ اخته شوی چې له کبله یې د بدن دفاعي سیستم ګډوډ کېږي او د «HLH» په نوم پېژندل کېږي. ویل کېږي چې نوموړی د روغتون د ځانګړې پاملرنې (ICU) په څانګه کې بستر دی.
د هغه ورور، غمي ځدراڼ، ویلي چې د شاهپور ناروغي ډېره شدیده وه او د بدن بېلابېلو برخو ته خپره شوې وه، ان تر دې چې پر مغزو یې هم اغېز کړی و. د ده په وینا، د درملنې له پیل وروسته د شاهپور حالت یو څه ښه شو او حتی له روغتونه رخصت هم شو، خو څه موده وروسته یې بېرته ناروغي شدیده شوه او یو ځل بیا بستر شو.
دا ناروغي د بدن دفاعي سیستم کمزوری کوي، او په دې حالت کې د وینې ځینې حجرې د بدن پر نورو حجرو برید کوي، چې د ځیګر او طحال (سپلېن) د لوېدو سبب کېږي. ډاکټران وایي، که دا ناروغي پر وخت ونه پېژندل شي، د مرګ خطر یې لوړ وي.
شاهپور ځدراڼ، چې اوس ۳۸ کلن دی، د افغانستان د کرکټ له مهمو لوبغاړو څخه و او د چپ لاس تېز توپاچوونکي په توګه یې شهرت درلود. هغه د ۲۰۰۹ او ۲۰۲۰ کلونو ترمنځ د افغانستان لپاره نړیوالې لوبې کړي او د هېواد د کرکټ د ودې په لومړیو کلونو کې یې مهم رول درلود.
نوموړی د ۲۰۱۵ کال په نړیوال جام کې د افغانستان د لوبډلې برخه و او په خپلو اغېزناکو توپاچونو سره یې پام ځانته رااړولی و. هغه په خپله اوږده مسلکي دوره کې د خپلې تهاجمي لوبې، لوړ قد، اوږدو وېښتانو او جدي مزاج له امله د مینهوالو په منځ کې ډېر محبوب و.
شاهپور ځدراڼ د ژوند لومړني کلونه په پېښور ښار کې د کډوال په توګه تېر کړي وو، هلته یې کرکټ پیل کړ، او وروسته بېرته افغانستان ته ستون شو.
د شاهپور د ناروغۍ د خبر له خپرېدو وروسته، د کرکټ ګڼو ستورو او مینهوالو د هغه لپاره د دعا او ملاتړ څرګندونه کړې ده، او هیله کېږي چې نوموړی به له دې سختې ناروغۍ روغ شي.