تاند ( چهارشنبه د وري – حمل ۲۶مه) د ملګرو ملتونو سرمنشي انتونیو ګوترېش وایي چې، د امریکا او ایران ترمنځ د مذاکراتو د دویم پړاو د بیاپیل احتمال زیات دی.
ګوترېش خبریالانو ته ویلي، هغه نښې نښانې چې د ملګروملتونو په واک کې دي، ښيي چې د ایران د جګړې د پای ته رسولو لپاره د خبرو اترو بیا پیل ډېر ممکن دی.
ګوترېش زیاته کړه چې پرون سه شنبه د پاکستان د لومړي وزیر له مرستیال سره لیدنه کړې او د سولې لپاره یې د دغه هېواد د هڅو ستاینه کړې ده.
نوموړي ویلي چې، دا غیرواقعي ده چې تمه وکړو داسې یوه پېچلې او اوږدمهاله مسله دې د مذاکراتو په لومړي پړاو کې حل شي.
هغه وایي د خبرو دوام ته اړتیا ده او دا هم اړینه ده چې د دې بهیر پرمهال اوربند وساتل شي.
دا په داسې حال کې ده چې، بل لورته د امریکا ولسمشر ډونالډ ټرمپ ویلي چې ښايي د ایران اړوند مذاکرات په راتلونکو دوو ورځو کې په پاکستان کې بیاپیل شي.
نوموړي دا څرګندونې پرون سه شنبه له «نیویارک پوسټ» سره په مرکه کې کړې دي.
د امریکا او ایران ترمنځ د مذاکراتو لومړی پړاو چې په اسلاماباد کې شوی و، بې پایلې پای ته رسېدلی و.