تاند ( چهارشنبه د وري – حمل ۲۶مه) د کډوالۍ نړیوال سازمان وایي، چې افغانستان کې یې تر ۲۳۰۰ ډېرو سېلاب ځپلو کورنیو سره بېړنۍ مرسته کړې ده.
یاد سازمان په خپله اېکس پاڼه لیکلي چې، یوازې د افغانستان په سوېل کې یې له ۶۵۰ کورنیو سره مرسته کړې ده.
دغه سازمان زیاته کړې چې، د افغانستان په شمال کې یې له ۶۳۲ کورنۍ، په سوېل کې ۶۵۰، په لوېدیځ کې ۴۴۷، په ختیځ کې ۵۶۰ او په مرکزي سیمو کې ۶۵ کورنیو سره د خېمو او نورو غیرخواراکي توکو بېړنۍ مرستې کړې دي.
بل لورته افغانستان کې د طالبانو د حکومت پېښو سره د مبارزې او چمتووالي ادارې ویاند محمدیوسف حماد وايي، چې د روانې وري میاشتې له شپږمې راهیسې د افغانستان په بېلابېلو ولایتونو کې د ورښتونو، سېلابونو، تندر پرېوتو، غرښوېدنې، زلزلې او د کورونو نړېدو له امله ۱۸۹ کسان مړه، ۲۵۹ ټپیان او ۹ کسان لادرکه شوي دي.
د حماد په وینا؛ د ورښتونو او سېلابونو له امله ۱۳۰۳ کورونه په بشپړ او ۵۸۴۶کورونه په نسبي ډول ویجاړ شوي او ترڅنګ یې ۳۷۲کیلومټره سړکونه هم لهمنځه تللي دي.