تاند (جمعه، د کب/ حوت ۹ مه) د بېلابېلو نړیوالو خبري اژانسونو د راپورونو له مخې، لږ تر لږه ۸۴ کسان تېره شپه (پنجشنبه) هغه مهال ووژل شول چې د پنجشنبې په ورځ د پاکستان او افغانستان ترمنځ پر ډیورند کرښه سخته جګړه ونښته، چې دا په وروستیو میاشتو کې تر ټولو خونړیو نښتو څخه ګڼل کېږي۔
د پاکستان دفاع وزارت ویلي چې د افغان طالبانو ځواکونو د خیبرپښتونخوا ایالت په بېلابېلو سیمو کې، په شمول د چترال، خیبر، مومند، کرم او باجوړ، «بې دلیله» بریدونه کړي دي۔ اسلاماباد وايي چې د پاکستان ځواکونو «سمدستي او اغېزمن ځواب» ورکړی، چې په لړ کې یې ۴۴ طالب جنګیالي وژل شوي، ګڼې سرحدي پوستې ویجاړې شوي او پوځي تجهیزات زیانمن شوي دي۔
د پاکستان د اطلاعاتو وزیر عطاءالله تارړ ویلي چې په دغو نښتو کې د پاکستان ۲ امنیتي سرتېري وژل شوي او ۳ نور ټپیان دي۔
خو افغان طالبانو د اسلاماباد ادعاوې رد کړې دي۔ د طالبانو ویاند ذبیحالله مجاهد ویلي چې په کونړ ولایت کې یې ۴۰ پاکستانی سرتېري وژلي، چې ۱۳ جسدونه یې ترلاسه شوي او تر ۱۷ پورې سرحدي پوستې نیول شوې دي.
د مجاهد په وینا په دې نښته کې افغان لوري ته هیڅ مرګژوبله نه ده اوښتې۔
له بلې خوا د طالبانو مرستیال ویاند حمدالله فطرت وویل چې ۱۵ پوستې نیول شوي او پاکستانی ځواکونو ته درانه تلفات اوښتي دي،
د دواړو لورو د تلفاتو شمېرې په خپلواکه توګه نه دي تایید شوې۔ همداراز نا تایید شوي راپورونه وايي چې ښايي د پاکستان برېښنايي جنګي سیستمونو یوه افغان ډرون الوتکه غورځولې وي.
دا وروستی تاوتریخوالی د فبرورۍ په ۲۲مه د پاکستان له لوري د افغانستان په ننګرهار، پکتیکا او خوست ولایتونو کې د هوايي بریدونو وروسته رامنځته شوی دی۔
د شاوخوا ۲۶۰۰ کیلومتره اوږدې لانجمنې ډیورنډ کرښې پر سر تاوتریخوالی د طالبانو له بیا واکمنېدو (۲۰۲۱) راهیسې دوام لري۔ پاکستان کابل تورنوي چې د پولې پورې غاړې بریدونو مسوول TTP جنګیالیو ته پناه ورکوي، خو افغان چارواکي دا تورونه ردوي۔ د ۲۰۲۵ کال د اکتوبر پخوانیو نښتو لسګونه کسان ووژل، او د نوومبر ناکامې سولې هڅې اړیکې لا پسې ترینګلې کړې۔
د ملګرو ملتونو د بشري حقونو لوی کمېشنر وولکر ترک د زغم او بیا خبرو غوښتنه کړې، او خبرداری یې ورکړی چې په دې بېثباته سرحدي سیمه کې د ملکي وګړو خطرونه زیاتېږي۔